شعیر: جعفر محمدی

 

معطل تانریلار

 

دوشونجه مین درنگه سینده، بیر باخیش دولو

سسی باتمیش سونا بولبولوم قدر سسله ییرم

آی آرزومون گؤیلرینده

ساچلاریننان آسیلمیش-سارایلارین اومودو

خیاللارا قاپیلمیرام

گئدیرم:

           سارماشیق تک تاریخیمین سینیرینا ساریلام

گؤز یاشلاریم چؤکسه ده اینتیظار چلنگیمه

آه معطل تانریلارا- اینامیم یوخدور داها

- بیر آغاجدیر

- بیر کندیردیر

                    قورتولوشا چاتان یولون

                    گئدیرم:

                             یاسلی یئتیم دویغولارین

                             تئللرینی

                                         اوخشویام.