قیسقانجلیق

یازار: ویلیام فالکنر

چئویرن: علی شیرین او

کؤچورن: توتقون

 

 

       - یئنه ده توخویورسان؟

قادین باشینی قالدیردی. اونون هامار دییرمی* صیفتی وار ایدی.مولایم قونور* گؤزلری آنی اولاراق ارینین باخیشلاریلا راستلاشدی.تئزده  گؤزلرینی اوندان چکدی و باشینی آشاغی سالیب اؤز ایشی ایله مشغول اولماغا باشلادی.

-         گؤردویون کیمی عزیزیم.

-         ائله هئی توخویورسان! اؤزونه باشقا بیر مشغولیت تاپسانا.

قادین کؤکسونو اؤتوردو، جاواب وئرمه دی.

-         نییه دینمیرسن،هه؟- اری  ال چکمه دی.- یوخسا دیلین- آغزین قورویوب؟

-         آخی سن اؤزون ، تونیو، تاپشیریبسان کی، یوخاریدا اؤز اوتاغیمدا دئییل، بورادا اوتوروم،-قادین باشینی قالدیرمادان جاواب وئردی.

-     پا ه ! بورادا بیر کس اوتورمالیدیر، یا یوخ؟ یوخسا سن ایسته ییرسن کی ، هانسی سا بیر آوارایا پول وئریب خانیم کیمی بورادا ایله شدیریم. اودا لاققیرتی وورسون، هه؟

یاغا بولانمیش اؤنلوک تاخان، اؤز ایشینین ماهیر اوستاسی اوجا بویلو گنج خیدمتچی  اونلارا یاناشیب حاق-حیساب قبضینی و بئش دوللارلیق کاغیذ پولو ایستولون* اوستونه قویدو. قادین پولون قالیغینی اونا اوزاتدی وبیر آنلیغا باخیشلاری اونون اوزونده ایلیشیب قالدی. خیدمتچی ساکیت باخیشلارلا اونون ارینی سوزدو.اونون باخیشیندا ایستحضالی بیر تبسم پارلاییب تئزده یوخ اولدو.ارینین ایستول اوزرینده اوزانیقلی الی ایختیارسیز دویونله ندی. او نسه تعجوبلو بیر شیی ایلک دفه گؤرموش کیمی بارماقلارینین گرگین لیکدن آغارمیش سوموکلرینه باخدی و دوداق آلتی سؤیوش سؤیدو. قادین باشینی قالدیردی و سویوق باخیشلارلا اونو سوزدو.

-         آخماق اولما، آنتونیو.

آنتونیو اؤزونو قیشقیرماقدان گوجله ساخلاییردی.

-         بو هله چوخ داوام ائده جک؟

-         بونو من سندن سوروشمالییام. هله آجیغینی مندن چوخ مو چیخاجاقسان؟

-         سنین ، بو ریاکارلیغین... او، حیددتله پیچیلدادی.

اونون خیردا گؤزلری قضبدن آلیشیب یانیردی. قادین سکسکه لی حالدا اطرافینا گؤز گزدیردی.

-         یاواش، - دئدی،- جاماعات باخیر. آخی مندن نه ایسته ییرسن؟ بلکه یوخاری قالخیم، هه؟

ارینین صیفتی واهیمه لی ایفاده آلمیشدی.

-         یوخ! – او داها اؤزونو ساخلایا بیلمه یه رک قیشقیردی. درحال دا سسینی آلچالدیب داوام ائتدی.

-         داها من دؤزه بیلمیرم، ائشیدیرسن می؟- او، سسینی بیر آز دا آلچالدیب پیچیلتیا کئچدی.- واللاه

اؤلدوره رم ، سنی.

قادین یئنه باشینی آشاغی سالیب توخوماغینا داوام ائتدی.

-         حالین هئچ اؤزونده دئییل.گاه دانیشیر، گاه قیشقیریر، گاه دا سؤیوش سؤیورسن. آخی نییه ؟

-         نییه سین سن چوخ گؤزه ل بیلیرسن.

-         من؟ منیم هانسی حرکتیم سنی اؤزونو بئله آپارماغا وادار ائدیر؟ آخی سن منی نده قیناییرسان؟ مگر

من سنه یاخشی عؤمور-گون یولداشی اولمامیشام می؟ مگر من سنین بوتون ایستک لرینی یئرینه یئتیرمه میشم می؟ سن اؤزون یاخشی بیلیرسن کی، من هر آخشام بورادا هئچ ده اؤز خوشوما اوتورمورام. سنین بو قیسقانجلیغین آغلینی لاپ الیندن آلیب.

-         یاخشی، یاخشی! من سنی خبردار ائله دیم. داها هئچ نه دئمه یه جه یم . – او گؤزلرینی ایستولدان –

ایستولا گزدیردی.خیدمتچی اؤز چیرکلی اؤنلویونده قاشقابقلی حالدا آرابیر گؤرونوب یوخ اولور، تانیش اولمایان تکببورلو قوناقلارا خیدمت ائدیر، داییمی موشتری لرینین سالامینا قیساجا جاواب وئریردی. یاراشیقلی اوجا بویلو خیدمتچی اللی و چئویک ترپنیردی. او نزاکتلی و خوش رفتار ایدی.آنتونیو ایستر- ایسته مز بو گنجین قیوراق ، اینجه حرکتلرینی اؤزونون یؤندمسیز یئریشی ایله موقایسه ائتدی و کینی قایناییب جوشدو. خیدمتچی بیرده اونلارین ایستولونا یاخینلاشدی، زالا* گؤز گزدیردی و آنی اولاراق باخیشلاری قادینین صیفتینه زیلله ندی. آنتونیو کناردا دورموشدو. هئله بو آن او، خیدمتچی یه طرف یئریدی. گؤزلرینه سانکی دومان چؤکموشدو. او اؤز آددیملارینین سسینی بئله ائشیتمیر، آیاقلاری آلتدا دؤشه مه نی حیس ائتمیردی. آنتونیو یاخینلاشاندا خیدمتچی هاراسا یوخ اولدو. باشینی آشاغی تیکمیش آروادی ایسه اولکی یئرینده اوتوراراق اؤز مشغولیتینده ایدی. ایستولون اوستونده ایچریسینده دیش قوردالایان اولان کیچیک بیر گولدان وارایدی. آنتونیو ایستولا طرف اییله رک  قیری- ایرادی گولدانی الینه گؤتوردو، و بارماقلارینی سیخدی. گولدان خیرچیلدایاراق پارچا-پارچا اولدو، آغاج دیش قوردالایانلاراطرافا سپیلدی. اونون بارماقلاری آراسیندا نازیک قیرمیزی خط عمله گلدی و بو قیرمیزی خط اوزاناراق الینین آرخا طرفینه کئچدی.

-         او سنه نه دئدی؟- سوروشدو.

     قادین باشینی قالدیردی، باخیشلاری توققوشدو. قادینین گؤزلری بیردن بویودو. سانکی حدقه سیندن چیخاجاقدی.

         - بورا باخ، - او ، ساکیت طرزده  دیلله ندی،- دییه سن سن لاپ عاغلینی ایتیرمیسن. ده گوروم مندن نه

ایسته ییرسن؟ مگر سن اؤزون منی بورادا اوتورتمادین می؟من کی ، بونو سندن خواهیش ائتمه میشم. آلتی آیدی کی ، گونومو گؤی اسکی یه بوکوب سن.گئجه گوندوز زهله می توکورسن. بوتون بونلارا سون قویولمالی دیر، یا یوخ؟ اؤزونو ییغیشدیریب آدام کیمی آپارماسان مندن الینی اوز. والدینلریمین یانینا قاییداجاغام. هر شی سندن آسیلی دیر، ایکی سیندن بیرینی سئچ آنجاق یاددا ساخلا کی بو ، سونونجو دفه اولاجاق. من سنه یاخشی عؤمور- گون یولداشی اولموشام. اؤزونو اوولکی تک آپارسان، بوندان سونرا دا اولارام. آنچاق بو گونکو منظره بیرده تکرار اولسا داها منیم آدیمی توتما.

       آنتونیو چئوریلدی، سرخوش و یوخودا گزن آداملار سایاغی کنارا آددیملادی. خیدمتچی یانیندان اؤترکن معصوم ، همده معناسیز بیر تبسم یئنی دن اونون حیس لرینی جوشدوردو. او ، باشی ایله خیدمتچی یه قیساجا ایشاره ائتدی و مطبخدن کئچه رک آرخا حیه طه چیخدی. اورادا دایانیب گؤزله مه یه باشلادی. آرتیق تیتره مه نین قارشی سینی آلماغا طاقتی چاتمادی. خیدمتچی اونون آردینجا چیخدی و داریسقال اونون سربست دوروشو دؤیوشدن اوول قیلینج اوینادان وضعیتینی آنلادیردی.

-     بورا باخ، - آنتونیو دیلله ندی. اونون سسی تیترییردی.-  من هر شیی بیلیرم. اورادا سیزین آرانیزدا نه اولوب؟ اونسوزدا هر شیی بیلیرم.ده گؤروم سیزین آرانیزدا نه اولوب؟

-         بیزیم آرامیزدا هئچ نه اولماییب، آنجاق بیز ایکیمیزده بئله حیساب ائدیریک کی سنین باشینا هاوا

گلیب.

-         چرنله مه!

-         چرنله مه؟ سن بونو منه دئییرسن؟ منه چرنچی دئییرسن؟

    گنج خیدمتچی ایره لی شیغیدی. آنتونیو اؤزوندن آسیلی اولمایاراق گئری چکیلدی. قورخاقلیغینا گؤره اوره یینده اؤزو – اؤزونه نیفرت اوخودو.

-         آخی من بیلمه لییم ، یا یوخ؟ آز قالیر عاغلیمی ایتیرم.

-         اونسوزدا عاغلینی ایتیرمیسن. بئله اولماسایدی، سنین جانینی آلاردیم. بورا باخ ای ، موردار دونوز،

بیل کی بیزیم آرامیزدا هئچ بیر شی یوخدور، بونا آند ایچه بیلرم. آنجاق قادینا یازیغیم گلیر. من سنین یانیندا اونا نه دئدیم کی، سن ائشیتمه دین؟ اگر او قادین کیمیسه اؤزونه جلب ائدیرسه، هرحالدا او آدام من دئییلم. بونو اونا گوره سنه دئییرم کی ، منیم اونا یازیعیم گلیر. هرحالدا سنین کیمیسینین شیتافلیغینا دؤزه ن باشقا بیر قادینادا منیم یازیغیم گلردی.

-         ائله ایندیجه سن اونا نه دئدین؟

     گنج خیدمتچی اونون صیفتینه بیر سیلله چکدی . آنتونیو دال- دالی چکیلدی.

-         من سنی اؤلدوره رم- دییه باغیردی.

-         باجارمازسان، - خیدمتچی دیلله ندی،- سن منی یالنیز نامردجه سینه اؤلدوره بیلرسن. بس اوندا سنین

بارنده نه دوشونرلر؟ آروادین سنی نامرد آدلاندیرسا خوشونا گلرمی، ایت اوغلو ایت؟

     تک قالمیش آنتونیو کوره یینی سویوق دیوارا سؤیکه دی. او ، چتین نفس آلیردی. اؤز حیرصی – حیککه سینه گؤره ، قورخاقلیغینا و کین – کدورتینه گؤره اؤزونه نیفرت یاغدیردی. بو ، حقیقت ایدی : خیدمتچی نی اؤلدوره بیلمزدی. او ، باشینی قالدیردی و بو داریسقال حایات اوزرینده سانکی موحکم ایپک کیمی تاریم چکیلمیش اولدوزلو گویه باخدی. اولدوزلار اوشاغلیغیندان اوزاق سیجیلیادا گؤردویو همن اولدوزلاردی. اوندا او ، بالاجا بیر اوغلان اوشاغی ایدی. حایات ساده ، گؤزه ل و قایغیسیز ایدی.

    اؤلدوره بیلمز! اؤلوم فیکری اونو هئچ راحات بوراخمیردی.آنجاق او ، بیلیردی کی داها  اوندان سونرا آروادینین اوزونه باخا بیلمز. بیلیردی کی ، آتا اوجاغیندان اونا یئنیجه پناه گتیرمیش ، اونون اوچون بوتون دونیادا ، حایاتین اؤزوندن بئله قیمتلی اولان بو قادین- اونون اوجوباتیندان کی ، بو حادیثه باش وئرجکدی،- اونو هئچ واخت باغیشلاماز. آنتونیو آرتیق یاشا دولدوغو، کیفیرلشدیی و کؤکلدییی حالدا ، او هله جاوان و خوشا گلیملی ایدی. آنتونیو کیمی باشقا کیشی لرینده اونا میل گؤسترمه سی مگر تعجوبلودور مو؟ مگر تعجوبلودورمو کی ، کیشی لر گؤزلرینی اونون اسمر صیفتینه، قیرمیزی دوداقلارینا، شیوه کیمی قاپ-قارا ساچلارینا  زیلله ییرلر؟ بس او ؟ اونلارین دیققتینی جلب ائتمک اوچون بیر شی ائدیرمی؟ یوخ! اؤزونون دئدیی کیمی قادین اونا یاخشی عؤمور-گون یولداشی اولموشدو. کؤچوب گئتمک. تکجه چیخیش یولو بودور. اونو باشقا شهره آپارماق.یئنی شرایط ده، تانیش اولمایان آداملار آراسیندا داها قایغیسیز یاشایا بیلرلر. او بئله ده ائده جک. او ، یئنه ده باشینی قالدیریب یوخاریدا سایریشان ، اونون طالعی تک قارماقاریشیق اولان اولدوزلارا باخدی.ترلی دریسینده سرین گئجه کوله یینین تماسینی حیس ائتدی و کؤکسونو اؤتوردو. آخیرکی، بیر قرارا گلمیشدی.

     آروادی ، دئمک اولار کی راضیلاشدی. بو پلانی قادینین والدینلری ایله آرایا قویدولار و بئله بیر آددیمین ضروریلیینه اونلاری ایناندیردیلار. یقین کی قادین هردن بیر اؤز والدینلرین گئت – گئده آرتان بو قیسقانجلیغی و حیرصی- حیککه سی باره ده معلومات وئرمیش. اودور کی، بو قرار والدینلری او قدرده تعجوب لندیرمه دی. عومومیتله اونلار آنتونیونو عاغیللی آدام حیساب ائدیردیلر. بو سارسیدیجی قیسقانجلیق خسته لیینه توتولانادک ایسه  اونا حتی خوش رفتار، بیرسؤزله یاخشی ار کیمی باخیردیلار. ائله یاخشی بیر ار کی ، اونون هر بیر فیکرینه شریک اولور ، دئدیکلری ایله راضیلاشیردیلار.

      بو قرارا گلدیکدن سونرا آنتونیو اؤزونو یاخشی آپارماغا باشلادی. ایشلری او قدر روان گئدیردی کی او حتتی قرارینی دییشمه یه بئله حاضیرایدی. آنجاق آروادی فیکریندن دؤنمزدی. رستورانی ساتماق فیکری اورتایا چیخدیقدا ، همین او اوجابویلو گنج خیدمتچی اونو آلماغا حاضیر اولدوغونو بیلدیردی.آنتونیو ایله اونون آراسیندا موناسیبت هله ده گرگین ایدی. آنتونیو هر وجهله اوندان چکینیردی. اونلار قیمت مسئله سینده راضیلاشماق اوچون بیر-بیری ایله یاخینلاشماق مجبوریتینده قالدیقدا موشتری اوزونو ائله آپاردی کی، سانکی هئچ نه اولمامیشدی. اونون آغایانا گولوشو همین کی گولوش ایدی. اونون بو گولوشو، توتقون صیفتینده دیشلرینین پاریلتیسی آنتونیونو تبدن چیخاردی، اؤزونون دوشوندویو کیمی ، سؤنوب اؤله زیمیش کین و قورخو حیسسینی یئنیدن آلولاندیردی.

      بودفه خیدمتچی اوولکیندن ده مولایم ونزاکتلی ایدی. او سینیورا ویدا هدیه سی باغیشلاماق فیکرینده اولدوغونو بیلدیریر وبو فیکرینده ائله نزاکتله عینادکارلیق گؤستریردی کی ، اونلار ایمتینا ائده بیلمیردیلر. نهایت، گون اورتا آنتونیو ایله خیدمتچی هدیه سئچیب آلماق اوچون شهره چیخدیلار. جاوان اوغلان بیر دوزوم بولور مونجوق ویا مدالیون هدیه ائتمک ایسته ییردی.بو جور شی لر ساتیلان عتیقه چی توکانینا گیردیلر. ویترین اؤزرینده اوست-اوسته قالاق-قالاق شکیل، گولدان، اویونجاق، قادین زینت اشیالاری، تونج اشیالار وقدیم سیلاحلار ییغیلمیشدی. خیدمتچی نظرده توتدوغو شی لری گؤتور-قوی ائدیب آلماق ایسته دییی مودتده آنتونیو ساکیتجه کناردا دورموشدو. آلیجی پنجره نین یانیندا دایانمیشدی. یوخاری قالخمیش الیندن مونجوغون ساپی ساللانیردی. باشی قاریشیق اولان خیدمتچی مودافیعه سیز اولدوغونو آنتونیو ایندی درک ائتدی و ایلک دفه ایکیلیکده بیر اوتاقدا اولدوقلاری بیر آندا اونو سانکی یوخودان آییتدی. رقیبینین حایاتی ایندی اونون الینده ایدی. همین آنداجا اونون الی ایختیارسیز ویترینین اوزرینده اوست-اوسته ییغیلمیش جیر-جیندیر آراسیندا موناسیب سیلاح آختارماغا باشلادی. آنجاق ایچینده هانسی بیر قووه سه اونون بئینینده کی بو آنی فیکیردن داشینماغا سووق ائتدی. آخی هر شی یولونا قویولموشدو. صاباح او، بو شهردن کؤچوب گئده جک و بو آدامی بیر داها گؤرمه یه جکدیر.یوخ ، آشینا ، دئمزسن می آلداتدیم؟

    آنتونیو الینه کئچن قدیم بیر تاپانچتنین اؤلوم ساچان بیر آلت اولدوغونو خیالدان کئچیردی-باخ بئله- و آغیر –آغیر تاریخین پاسلی یادیگارینی الینه آلدی. باش بارماغی ایله چاخماغی آشاغی چکدی و تاپانچانین اوتوز ایلده ترپنمه ین یایی موحکم سیخیلماغا باشلادی. باخ بئله-دییه آنتونیو اونون نییتیندن خبرسیز اولان، اووللر بیر دفه اؤلدورمک ایسته دییی خیدمتچی نی نیشان آلاراق اؤز-اؤزونه پیچیلدادای و ماشانی چکدی.

       کیچیک اوتاغی گورولتو بورودو. لوله دن آلو ایلدیریم کیمی باییرا شیغیدی.گنج خیدمتچی اوولجه شوشه وازلارلا و قدحلرله دولو اولان ویترینین اوزرینه سریلدی. سونرا ایسه سوروشوب دؤشه مه یه دوشدو. الینده داغیلمیش سیلاح اولان ، دایانیب پولیس گلنه دک قیشقیران آنتونیونون سسی اوتاغی باشینا گؤتورموشدو.

 

 

 

دییرمی :  یومرو

قونور :  قهوه ای

ایستول :  میز

زال :  سالن

 

قایناق: www.litaz.az